Sugeng dalu,
Para sesepuh lan para
pinisepuh ingkang tuhu dahat kinabekten, bapak kepala dukuh ingkang tuhu
kinurmatan, pangarsa pepanggihan ingkang kinurmatan, lan sedaya para rawuh
ingkang winantu kabagyan.
Sumangga kula aturaken puji syukur dhumateng Gusti Allah ingkang Maha Asih, ingkang
sampun paring rahmat lan hidayahipun dhateng kula lan
panjenengan, satemah kula lan panjenengan saget makempal ing wekdhal menika
tanpa alangan setunggal menapa.
Bapak/Ibu sagung para
rawuh ingkang kinurmatan,
Langkung rumiyin, kula
nyuwun agengipun pangaksami, amargi sampun kumawani munggel pangandikan
sawetawis. Awit wekdhal menika, kula kadhawuhan ndherekaken lampahing acara
“Pengetan 68 Dinten Kamardikan RI”.
Para rawuh ingkang
kamulyakaken, saderengipun acara kawiwitan, keparenga kula maosaken rantamaning
acaranipun wonten ing wekdhal punika.
1.
(Acara ingkang kaping
setunggal) pambuka.
2.
(Acara ingkang kaping
kalih) lagu Indonesia Raya.
3.
(Acara ingkang kaping tiga) atur
palapuran saking pangarsa pepanggihan.
4.
(Acara ingkang kaping
sekawan) atur pangandikan saking bapak kepala dukuh.
5.
(Acara ingkang kaping
ganggsal) andharan riwayat perjuangan bangsa Indonesia.
6.
(Acara ingkang kaping
enem) mancawarna.
7.
(Acara pungkasan)
inggih menika ndedonga sesarengan lan dipun lajengaken panutup.
Para rawuh
ingkang winantu kabagyan,
Mekaten
rantamaning acara ing wekdhal menika, pramila sumangga kula lan panjenengan amiwiti acara kaping setunggal inggih menika pambuka kanthi maos donga piyambak-piyambak sesarangan.
Bapak/Ibu sagung para
rawuh ingkang kinabekten,
Acara salajengipun
ingkang kaping kalih inggih menika nyanyi lagu Indonesia Raya, dhumateng para
rawuh keparenga jumeneng sawetawis. Lan dhumateng sedherek Nandar ingkang
smapun piniji ngayahi ganti, kula aturaken
..................................................................
Matur nuwun, sedaya
keparenga lenggah ingkang prayogi.
Bapak/Ibu sagung para
lenggah ingkang winantu ing suka basuki,
Acara ingkang kaping
tiga, inggih menika atur palapuran saking pangarsa pepanggihan. Dhumateng Bapak
Jumadi kula aturaken sumangga.
Para rawuh ingkang
tuhu kinurmatan, acara ingkang kaping sekawan, inggih menika atur pangandikan
saking bapak kepala dukuh. Dhumateng panjenenganipun Bapak Suratman, kula
aturaken.
Bapak/Ibu ingkang kula
mulyakaken, acara ingkang kaping gangsal, inggih menika andharan riwayat
perjuangan bangsa Indonesia kaliyan sedherek Lina. Dhumateng sedherek
Lina, kula sumanggakaken.
Para rawuh ingkang
tuhu kinurmatan, acara ingkang kaping enem, inggih menika mancawarna. Awit
saking menika, dhumateng para adhek ingkang badhe caos panglipur, kula aturaken
sumangga.
Bapak/Ibu sagung para
rawuh ingkang tuhu kinabekten, dumugi titi wancinipun acara pungkasan, inggih menika
ndedonga sesarengan kangge para pahlawan ingkang sampun gugur kang dipun
dherekaken dhateng Bapak Rois lan dipun lajengaken panutup.
Saderengipun pungkasing acaranipun, kula ingkang kadhawuh
ndherekaken rantamaning acaranipun ing wekdhal menika menawi kathah klentunipun
ing basa dalasan subasita. Kula nyuwun agungipun pangaksami. Jenang sela wader
kali sesondheran, apurana yen wonten lepat. Matur nuwun.
